Embassy of The Federal Democratic Republic of Ethiopa
in the Republic of South Africa






  • 1
  • 2
  • 3
  • 4
  • 5

 abiyበቅርቡ ኢትዮጵያ ውስጥ እየተካሄደ ያለውን ፖለቲካዊ፣ ማህበራዊ እና ኢኮኖሚያዊ ለውጥ ወደ ላቀ ደረጃ ለማድረስ ክቡር ጠቅላይ ሚኒስትር ዶ/ር ዓብይ አህመድ በሀገር ውስጥም ሆነ በውጭ አገራት ከሚኖሩ ሁሉም ዜጎች ጋር በጥምረት የመስራት፣ የመደመር እና የአንድነት መስመር በመዘርጋት ላይ የሚገኙ እንደሆነ ይታወቃል፡፡ ከዚህም ባሻገር ከተለያዩ መንግስታት እና ዓለም ዓቀፍ ድርጅቶች ጋር ሀገራችን ያላትን ዲፕሎማሲያዊ ግንኙነት ለማጠናከር ልዩ ትኩረት በመስጠት እየተሰራበት ይገኛል፡፡ 
ይህንን ዓላማ መነሻ በማድረግ ክቡር ጠቅላይ ሚኒስትር ዶ/ር ዓብይ አህመድ ለደቡብ አፍሪካ ፕሬዚዳንት ክቡር ስሪል ራማፖሳ ነሐሴ 15 ቀን 2010 ዓ.ም ልዩ መልዕክት በቀድሞ ጠ/ሚ/ር ክቡር አቶ ኃይለማርያም ደሳለኝ አማካኝነት መላካቸው ይታወሳል፡፡ የቀድሞ ጠ/ሚ/ር ክቡር አቶ ኃይለማርያም ደሳለኝ ከደቡብ አፍሪካ ፕሬዚዳንት ክቡር ስሪል ራማፖሳ ጋር ባደረጉት ውይይት ኢትዮጵያ እና ደቡብ አፍርካ ያላቸውን የሁለትዮሽ ግንኙነት ወደ ላቀ ደረጃ ለማሸጋገር እና በአፍሪካ አህጉር እና ዓለም ዓቀፍ መድረኮች ያላቸውን የጋራ ሚና ለማሳደግ እንዲሁም በደቡብ አፍሪካ የሚኖሩ ኢትዮጵያውያንን መብትና ጥቅም ለማስጠበቅ የሚቻለውን ሁሉ ለማድረግ ተስማምተዋል፡፡ 
ይህንን ተከትሎ ክቡር ጠቅላይ ሚኒስትር ዶ/ር ዓብይ አህመድ በቀጣይ በደቡብ አፍሪካ ይፋዊ የስራ ጉብኝት እንደሚያደርጉ የሚጠበቅ ሲሆን፣ ጉብኝቱ ውጤታማ እንዲሆን ከኢትዮጵያ ኤምባሲ፣ ደቡብ አፍሪካ ከሚኖሩ መላው የኢትዮጵያዊያ ማህበረሰብ አባላት እና ከተለያዩ የደቡብ አፍሪካ መንግስት አካላት የተውጣጣ ዓብይ ኮሚቴ ተደራጅቶ ዝግጅት እየተደረገ ይገኛል፡፡ 
ይህ ዓብይ ኮሚቴ በውስጡ የተለያዩ ንዑሳን ኮሚቴዎችን ያቀፈ ሲሆን፣ ለጠቅላይ ሚኒስትሩ ጉብኝት ስኬታማነት የተለያዩ የዝግጅት ስራዎችን በማከናወን ላይ ይገኛል፡፡
በመሆኑም በሀገር ውስጥም ሆነ በውጭ በሚኖሩ ኢትዮጵያዊያን ዘንድ እየተፈጠረ ባለው የመደመር እና የአንድነት አስተሳሰብ መሰረት ክቡር ጠቅላይ ሚኒስትራችንን ለመቀበል በምናደርገው ዝግጅት ላይ ሁሉም የበኩሉን ድርሻ እንዲወጣ የዝግጅቱ አስተባባሪ ዓብይ ኮሚቴ በአክብሮት ጥሪውን ያስተላልፋል፡፡ 
በቀጣይ ዓብይ ኮሚቴው በየደረጃው የሚደረጉ እንቅስቃሴዎችንና የሚገኙ ውጤቶችን እየተከታተለ ለህብረተሰቡ እንደሚያሳውቅ ይገልጻል፡፡